د لوړو زده کړو وزارت څلورمه ګڼه خبري فصلنامه چاپ او خپره شوه

نن یکشنبه د ۱۴۰۳هـ.ش د سلواغې په ۷مه، د لوړو زده کړو وزارت خبري فصلنامې څلورمه ګڼه چاپ او خپره شوه.

یاده ګڼه مرکزي پوهنتونونو او ریاستونو ته د وېش په حال کې ده او د هېواد ټولو پوهنتونونو او دیني جامعاتو ته به هم ولېږدول شي.

د خبري فصلنامې په دې ګڼه کې د لوړو زده کړو وزارت محترم سرپرست وزیر، محترمو معینانو، مرکزي ریاستونو او په ټوله کې د لوړو زده کړو وزارت اړوند عمده او مهم فعالیتونه خپاره شوي دي.

د یادې خبري فصلنامې مسؤل مدیر او د لوړو زده کړو وزارت د اطلاعاتو نشراتو او عامه اړیکو رئیس حافظ انجنیر روح الله روحاني وایي چې په چاپي برخه کې د لوړو زده کړو وزارت مهم فعالیتونه او کړنې ثبتول او ښه انعکاس ورکول زمونږ ټولو مسؤلیت دی. د نوموړي په وینا؛ دا نه یوازې راتلونکو نسلونو ته لیکلی تاریخي مستند پاتې کېږي، بلکې د چاپي رسنیو اهمیت او د مطالعې کلتور ورسره وده کوي.

د یادونې ده چې دغه خبري فصلنامه د لوړو زده کړو وزارت په امتیاز او مالي لګښت په هرو دریو میاشتو کې یو ځل خپرېږي، چې نن ورځ څلورمه ګڼه او د دویم کال درییمه ګڼه چاپ او خپره شوه.

نېټه: یکشنبه

۱۴۴۶ هـ.ق د رجب المرجب ۲۵مه

۱۴۰۳ هـ.ش د سلواغې ۷مه

۲۰۲۵ م د جنوري ۲۶مه